【你轉完未啫】
Jumpy，應用喺Job market即係解成日轉工，雖然大家都知呢樣嘢唔好，但究竟真實中有幾咁唔受歡迎，影響又會有幾大呢? 一齊去後台睇下真相。
有一次我推薦個求職者畀某公司，對方收到之後就話麻麻哋，太Jumpy喎，我當堂嚇一跳，然後得啖笑，我個求職者畢業出嚟只係做過一份工，為期兩年，而家就apply你份工，咁都叫Jumpy? 呢個實例雖然矯枉過正，但的而且確係真事，可想而知喺某啲僱主同埋HR嘅心目中，對Jumpy嘅尺度捉得好緊，特別係大公司。
至於Headhunter，即係Agency公司，做法都係將你嘅CV 格式化一次，因為佢唔可能原汁原味將你嘅CV畀個客，人人CV格式都唔同，咁樣畀個客，對方會好亂，你唔格式化，佢不如靠JobsDB，使鬼搵Agency咩，而且Headhunter通常都會幫你執到啲優點好突出，再列舉你最吸引人嘅賣點 (講緊盡責嘅Headhunter)。有一次我親眼睇住隔離位同事扯晒火，執執下份CV突然爆Seed: 「妖，唔執喇，執極都執唔完，個客係咁催，已經執咗成粒鐘。」 我望一望佢個求職者份CV，目測都做過12至15份工，真係copy and paste都手軟。
HR雖然唔係sales，但都會俾各部門主管「捽數」催交人，睇一份Jumpy嘅CV除咗眼都花之外，請一個Jumpy嘅人又隨時幾個月，甚至幾日貨仔，拍下屁股走咗，HR又要零分重作，再出稿，再interview，好似無限輪迴咁，試問HR點解要自己捉蟲? 部門主管都會俾面色個HR睇啦。
見過有外國公司話歡迎求職者係Jumpy底，因為佢知道自己要乜，覺得公司唔啱先至轉，我曾經好buy呢個講法，因為我都Jumpy過，但後來諗真啲先覺得有問題，如果認為公司唔適合自己，轉一次、兩次、三次、四次都好合理，唔對路梗係跳船啦，唔通盲目效忠咩，但係當你轉到第六次、七次，甚至八次以上，係咪應該諗下，問題其實喺自己身上呢? 次次都上錯船? 咁都反映咗自己嘅判斷力好差。Jumpy，仲可以睇到一個人嘅責任感同埋有冇承擔，你下下拍散拖，另一半點會信你專一?
我把口係咁講咋，但我上個月都畀咗機會一位好Jumpy嘅求職者，點解? 因為我後生都好Jumpy囉，我覺得一定要畀機會人，結果......我衰咗。
「王生，你轉咗十幾份工喇喎，有啲又做兩個月，點解嘅?」
「哦，因為嗰份做落發覺唔啱，好多鑊氣，而另一份呢，個上司有啲問題......(下刪數百字)，不過我而家都30幾歲，想要穩定嘅工作，你幫幫手吖，我會好畀心機做。」
「係呀，其實咁樣好影響你自己，呀，另外你95年畢業，點解第一份工係98年嘅? (心諗坐咗3年監呀?)」
「哦，嗰3年試咗好多工都唔啱自己，有啲返咗幾日，有啲返得一個月，公司信都冇攞，所以唔寫落CV喇，不過你今次呢份係大公司，地點又好，我好想做呀，屋企人又日日催我搵工，唔該你幫幫忙吖。」
其實Jumpy嘅人，絕對係見工達人，佢哋見好多工都請，所以先有權去Jumpy，王生見呢份工都唔例外，一take過pass請咗，不過3日之後，佢同我講唔好意思，話唔做喇，跟住佢又講咗一大堆公司、同事同埋工作內容嘅缺點。其實每份工都有好同唔好嘅地方，如果有份工係100%完美，上一手就唔會走，你就唔會有機會入去做啦，Jumpy人嘅特質係，放大啲缺點，同埋搵好多理由支持自己唔做。
Jumpy仲有咩影響? 王生呢個position，其實我之後仲收到幾位好有誠意，過往工作好穩定，態度又好好嘅求職者，但係佢哋因為王生Jumpy，全部都冇機會去interview，因為嗰間公司個部門主管躁咗，HR就自然躁埋一份，呢個position決定搵人以part time或contract形式做，我真心覺得之後嗰幾位求職者好無辜。
王生，你份CV好似施政報告咁厚喇，你轉完未啫?
Search